TURA: Sukrobar pringwalo, Assam a·dokni sima jolo donggipa South West Garo Hills a·jani song damsao matchu cha·ugipa mande saksako songni manderang rim·enba dokgrime siataha ine kobor on·aha.
Koborko on·ani gitade, Sukrobar pringwalni 2:00 bajimango Adugre songni manderang, matchu cha·ugipa mande saksako matchu manggittam cha·ue ra·angengmitingko rim·na man·aha. Ia matchurangko ua samba jolo donggipa Rongsang Ajirigre minggipa songoniko cha·uangahachim.
Ia matchu cha·ugipa rim·ani ja·man songni manderang ka·a ding·chaoenba, jinma dokaha aro ua bilongbee saknaanirangko man·aha.
Ia a·selni bidingo koborko man·soa bakan Betasing police outpost-ni sipairang, ua biapona re·angon matchu cha·ugipako siboke dongakosa nikeaha. Uko bakan police-rang sepangbatgipa hospital-ona ra·angahachim indiba hospital-ona sokangon uko siaha ine doctor-rang parakataha.
Sianggipa mandeara, Assam a·dokni South Salmara a·jao donggipa Chengurchar songoni ong·achim ine police-rang u·iataha.