AMPATI: Sukrobar salo, South West Garo Hills a·jani District Social Welfare Office aro District Legal Services Authority (DLSA) nangrimenba, butchuma budeparangni salko South West Garo Hills a·jani Bainapara Community Hall-o maniangaha.
Ia salko manianio South West Garo Hills a·jani Deputy Commissioner Ch Ramakrishna, mongsonggipa sokgipa ong·e jinmana aganprakengon, a·jao donggipa pilak butchuma budeparangna district administration-ni gita pilak nanga dakchakanirangko on·angkugen ine ku·rachakaniko on·angaha.
South West Garo Hills a·jani butchuma budeparang, maming u·iatchengani grian je somoioba an·tangni office-ona ba je sorkari office-onaba re·angna man·aigen ineba Ramakrishna, ku·rachakaniko on·angaha.
Butchuma budeparangni salko manianio Bainapara songni bilsi 89 ong·gipa Senilla G Momin aro Aringre songni bilsi 95 ong·gipa Sanjing Marak-na ia tom·anio brebatbatsranggiparang ong·ani gimin dingtangmancha mande ra·pilskaaniko dakangaha.
South West Garo Hills a·jani DSWO I/c Zanera Marak-ni u·iatani gitade, ia tom·anio sak 159-mangni gita butchuma budeparang dongpae bak ra·angaha.
Ia tom·anio jinmana aganprakanggipa gipin manderangara, DLSA-ni Advocate Samir Chakravorty, Betasing PHC-ni Senior Medical Officer Dr Midrose Marak aro gipinrang ong·a.
