SHILLONG: India a·songni salgro salaram jolrango namroro silroroaniko ra·bana gita tom·tomaniko nangchongmota ine Sombar salo, a·songni Vice President Venkaiah Naidu aganaha.
Sombar salo, Shillong-oni Dawki-ona dakanggipa ramako tarina pamgchakaniko songe on·angani somoio ua jinmana aganprakengon, namroro silroroaniko ra·bana gitade tom·tomaniko nanga aro salgro salaram a·dokrango tom·tomaniko nangchongmotenga ine parakangaha.
Salgro salaram a·dokrango bobil dake chakatanirang komiangaha ine an·tangni kusi ong·aniko parakangengon, ia jolrango bobil dake chakatanirangko chu·gimik bon·atsrangna gita iandakgipa dolrang baksa agangrikna aro bobil dake chakatgipa manderang silchidarerang keani watgale tom·tomaona re·bachina pilakan nangrime kamko ka·na nanga ine Vice President aganaha.
Salgro salaram jolni manderangna namroro silroroani, an·seng baljokani, kam ka·e cha·ani cholrang aro rama jal·langrangko nangchongmota ine janapatengon, salgro salaram a·dokrango bobil dake chakatani a·selsa ia pilak kamrangkon champengengachim ine Naidu aganaha.
Tom·tomao songdong a·chachina aro samtangtango ong·telaigiparangna simsak nirokchina gitaba ua jolo songdongenggipa manderangko didiangaha.
Salgro salaram a·dokrango a·brirara dakani gimin aro mikkarang warongani gimin rama jal·langrangko tarianio neng·nikanirangko chagrongna nangronga ine janapatengon, a·briarigipa biapo ramarangko tarina gita dingtang cholrangko sandiskachina gita Vice President didiangaha.
Meghalaya a·doko Tourism-ni kamrangko tang·doatna gita NH-40 ramako taridapna nangengani giminba Naidu aganangaha.
Salgro salaram a·dokrango namroro silroroaniko ra·bana tom·tomaniko nanga: Venkaiah Naidu
Date:
Share post:
