4th teacher-rangni dormahako bariatjaengani gimin suk ong·gijaniko paraka

TURA: Meghalaya a·dokni 4^th teacher-rangnaba gipin skigiparang gitan apsan dormahako on·china changni chang sorkario dabiengoba, uamangni dabianiko knachakjaengani gimin Sombar salo, All Garo Hills 4^th Teachers Association (AGH4thTA) suk ong·gijaniko parakataha.

“Chingni dormahako 2017 bilsionin bariatkujaenga aro iani bidingo chinga baditaba sak minister-rangko gronge chingni dormahako bariatchina mol·molahaoba da·onan chingna japrako gong 12,000/-kosan on·engkua,” ine 4^th teacher-rang parakataha.

Association-ni parakatani gitade, uamangni RTI ka·e am·sandion, a·dokni 4^th teacher-rangna dormahako bariatchina gita DSEL aro special officer, changbrina kingking proposal-ko on·atmanaha ine nikna man·ahachim indiba ia proposal-ko Finance department aro Education minister da·onan ra·chakskakujaengachim.

Assam aro Tripura a·dokrangode ‘4^th teacher’-rang dongja ine janapatengon, maini gimin Meghalaya a·dokode uamangko 4^th teacher ine mingteenba dormaharangoba on·chepe roenga ine AGH4thTA, sorkario sing·doangaha.

4^th teacher-rangni dormahakoba gipin skigiparangna on·enga gitan apsanko on·china gita skigiparang, a·dokni Chief Minister Conrad Sangma aro Education Minister Lahkmen Rymbui-ko mol·molattaiaha.