TURA: Tura-o bading chiwale cha·gipa mande saksa, Meghalaya Cooperative Apex Bank (MCAB) Chandmary Branch-oniko Prime Minister’s Employment Generation Program (PMEGP) loan-ko ra·enba, an·tangna ja·kop tariani karkanako a·bachengatna man·aha.
Koborko on·ani gitade, Tura-o bading chiwale cha·enggipa Tengsrang A Sangma, PMEGP loan-ko ra·enba, Tura-ni Rongkhon Songgital jolo ‘Ja·kop Footwears’ ine bimingko done ja·kop tariani karkanako a·bachengataha.
Uni karkanao tarienggipa ja·koprangko wholesale-na joraprako gong 70 ba gong 80 ka·e aro dokkanrango joraprako gong 100 ka·esan palengani gimin ian pilaknan namgni ong·gnok ine nikna man·enga.
Uni iandake an·tangni karkanako a·bachengatahani gimin West Garo Hills a·jani Deputy Commissioner-ba Tengsrang-na an·tangni kusi ong·chakaniko parakataha aro uni kamrangchi gipin chadamberangnaba iandakgipa janggi tangani cholrangko dake ra·china didiani ong·gen ine parakataha.