TURA: Adita salrangna skang, Tura aro Williamnagar-oni Shillong-ona re·angenggipa MTC bus gari, Nongchram-o a·sel ong·e dakchakanirangko nangenggipa manderangna ka·dongbee dakchakanirangko on·ahani gimin East Garo Hills a·jani Police-rang, Budbar salo chadambe sakbrina mande ra·pilskaaniko dakangaha.
Ia chadambe sakbrini bimingranga Sengrik D Sangma, Nilbath D Sangma, Walgrik M Momin aro Jinjas D Marak ong·achim aro ia gari a·sel ong·ani somoio uamang Ringdi chiringona re·ange ka·dongbee kamrangko ka·ahani a·sel komibeoba sak 16 manderang jokatako man·aha ine kobor on·aha.
East Garo Hills a·jani SP Bruno A Sangma-ni parakatani gitade, ia gari a·sel ong·na skangan ia chadamberang, ia bus garini ta·rakbee re·angako nikrikahachim aro ja·mano ia bus garini ga·akonako knae uamang bakan ta·rakbee jokenggipa Ringdi chiringona ong·onange, dakchakanirangko nangenggipa manderangko jokateaha.
“Ia garini a·sel ong·ani somoio uamang ta·rakbee jokenggipa Ringdi chiringona ong·onange dakchakanirangko on·ahani a·sel komibeoba sak 16 manderang jokatako man·aha. Ia chadamberangni kamna chinga uamangko mittela aro uamangko salam ka·a,” ine Sangma parakataha.