TURA: South West Garo Hills a·jao Maternity & Child Health (MCH) Hospital-ko Mahendraganj-o rikna sorkarini tik ka·aniko jegale Mongolbar salo, dingtang dingtang dolrang aro jolo songdongenggipa manderang, Ampati-o jinma tom·e re·jomaniko ong·atangaha.
Ia MCH hospital-ko rikna gita Chapahati songo acre 10-12-mangko on·gilmanaha aro a·ani bidingo meligrikgijaniko namatahaon ia hospital-ko rikna a·bachenggnok ine adita salrangna skangsan Assembly-ni Autumn Session-ko ong·atanio a·dokni Deputy Chief Minister aro Health & Family Welfare Minister Prestone Tynsong parakatahachim.
Indake ong·engon, ia hospital-ko rikna tik ka·gimin biapara South West Garo Hills a·jani kona noksikosa ong·e aro Bangladesh a·songni sambaosa ong·e South West Garo Hills a·jani gipin biaprango songdongenggipa manderangnade re·a doanio neng·nikanirang ong·gen ine dingtang dingtang dolrang jegaltokenba, ia hospital-ko Ampati-o donggipa civil hospital sambaon ba uni samba jolon rikchina gita dabiangtokaha.
Jinma jegale re·jomaniko South West Garo Hills a·jani GSU, GSMC, AYWO, AYC, AHAM, Mothers Union aro uandakgipa dolrang baksana dingtang dingtang mondolini dilgiparang, nokma sordarrang dakdilangaha aro re·jomanio a·jao songdongenggipa bang·bea manderang bakko ra·angtokaha.
“MCH hospital-ko sorkari, Mahendraganj jolo rikna jotton ka·engani gimin chinga sorkarini kamo suk ong·gijaniko mesokna gita da·al ia jegalaniko dakangaha. MCH hospital-ara an·o donggipa aro bi·sa bakgitchakrangna namen nangchongmotgipa hospital ong·a aro ia hospital-ko Mahendraganj jolosa rikgenchimode a·jani gipin biaprango songdongenggipa manderangde re·a doanirango bang·en neng·nikanirangko man·gen. Uni gimin ia hospital-ko pilakni namgninan a·jani headquarter-o rikna man·ode nambatgen,” ine GSU Ampati zone-ni president Salman Sangma parakataha.
Ia hospital-na kanggimin biapko apjitjagenchimode mikkangchi jolni NGO-rang bilakbate jingjengatanggen ineba GSU mikrakataniko on·angaha.