TURA: Re·baenggipa October-ni 30 tariko ong·atna sienggipa Rajabala Assembly constituency-ni by-election-o susana gita Bristibar salo Congress dolni candidate Hashina Yasmin Mondol, Tura-ni DC office-ona re·ange nomination file ka·angaha.
Rajabala by-election-o susaenggipa Congress candidate Hashina Yasmin Mondol-ara Rajabala-ni sianggipa MLA Dr Azad Zaman-ni jikgipa ong·achim aro ia by-election-o susana gita gipin candidate-rangba Congress dolni tikitna dorgastoko galtokahaoba party tikitko una on·skaahachim.
Bristibar salo ua, Congress dolni dingtang dingtang dilgiparang baksa Tura-ni DC office-ona re·ange Returning Officer CN Sangma-ni mikkang an·tangni nomination-ko file ka·angaha. Uni nomination file ka·ani somoio a·dokni gitcham chief minister aro Congress Legislature Party (CLP)-ni dilgipa Mukul Sangma-de dongskajahachim.
Rajabala by-election-na nomination file ka·giparangoni Congress candidate Hashina Yasmin Mondol, gnigipa ong·enga maina una skang, NPP-ni candidate Abdus Saleh, Budbar salo nomination file ka·eskaahachim.
Indake ong·engon, ia by-election-na nomination file ka·ani somoi October 8 tarik attamni 3:00 bajion bon·engahani gimin ia bon·kamgipa salon UDP-ni candidate Ashahel D Shira-ba an·tangni lekkarangko on·enaba gnang ine ka·dongsoenga. GHADC-ni Congress MDC Ashahel Shira, ia by-election-o susana gita Congress dolni tikitko man·rikjahani gimin UDP dolo nape, ia Rajabala by-election-o susaskaengachim ine nikna man·a.
Indake ong·engon, ia apsan Bristibar salon, Mawphlang aro Mawryngkneng Assembly constituency-ni by-election-o susana gita NPP-ni candidate sakgniba an·tangtangni nomination-rangko file ka·angaha ine kobor on·aha.
Mawphlang by-election-na Lamphrang Blah aro Mawryngkneng by-election-na Pyniaid Syiem, sakgnian NPP-ni candidate ong·e Bristibar salo nomination-ko file ka·angaha aro uamangni nomination file ka·ani somoio NPP-ni national president aro a·dokni Chief Minister Conrad K Sangma baksana a·dokni Deputy Chief Minister Prestone Tynsong aro NPP-ni gipin dilgiparangba dongpaeaha.
