Kamrang ta·raken matchotgnok ine Minister a·kanga
TURA: Tura Babupara-o gital dake rikenggipa Garo Labour Corps-ni Cenotaph-ko Sombar salo, a·dokni Cabinet Minister Marcuise N Marak, Preservation of Garo Arts, Culture & Heritage Sub-Committee-ni membor-rang aro gipin CSO-ni dilgiparang baksa nieaha aro ia Cenotaph-ko ta·raken matchotna siengaha ine parakataha.
Ia Cenotapha-ara, a·gilsak gimikni skanggipa dakgrikanio (First World War), an·tangtangko on·kange France a·songona re·anggipa pagitchamrangko gisik ra·na aro mande ra·na tarigipa cenotaph ong·achim aro bilsiantian July-ni 16 tariko Garo Hills-ni manderang, ia biapo jinma tom·enba, pagitchamrangko gisik ra·e mande ra·pilskaaniko dakrongengachim. Indake ong·genchimoba, ia Cenotaph-ko Garo Hills-o songdongenggipa manderang baksa aro dingtang dingtang dolrang baksa chanchirimchenggija gital dake rikna pe·galani ja·man, dingtang dingtang dolrangni aro Garo Hills-o songdongenggipa manderangni matnanganirangko man·ahani gimin sorkari, ia Cenotaph-ko apsan biapon, apsan bimangon rikpiltaina gita kamrangko a·bachengataha aro ia kamrangko nirokna gita Preservation of Garo Arts, Culture & Heritage Sub-Committee-ko songe donangaha.
Indake ong·engon, re·baenggipa July 16 tarikon Garo Labour Corps Day-ko manitaina siengahani gimin Sombar salo, a·dokni Cabinet Minister Marcuise N Marak, a·dok sorkarini pal, gital dake rikenggipa Cenotaph-ko niangaha.
Ia Cenotaph-ko niangani ja·man a·dokni Cabinet Minister, kobor ra·timgipa manderang baksa agangrikengon, ia Cenotaph-ko rikani kamrang ta·raken matchotangengaha aro ia cenotaph-ko jasani gisepon matchotnaba gnang ine an·tangni ka·dongchakenganiko parakangaha.
“Ia biapo rikenggipa Cenotaph-ko a·paloni nigenchimode kamrang maming ong·kujaenga gita nika indiba ning·ao kam ka·anirangko nigenchimode kamrangni ta·rakako ma·sina man·a. Ia cenotaph-ko jasani gisepon matchotnaba dongaha,” ine Marak aganaha.
Cenotaph-ko rikani kamrang ta·rakengaha ine ua dingtangmancha official-rangko aro ia cenotaph-ko rikanio bak ong·enggipa manderangkoba mittelpilangaha.
