SHILLONG: Re·baenggipa October-ni 30 tariko ong·atna sienggipa Mawphlang aro Mawryngkneng Assembly constituency-rangni by-election-o susana gita Congress dolni dilgiparangko rime kata ine Sukrobar salo Opposition Congress dolni dilgiparang, National People’s Party (NPP)-ko matnangataha.
“Mawphlang aro Mawryngkneng by-election-o susana gita gitcham MDC Lamphrang Blah aro dolni dilgipa Norbert Marboh-ba tikitna dorgasto galjahachim indiba saksamangmangsan dorgasto galaiachim. Uamang sakgnian rang·gitik ia bye-election-o susana tik ka·aniara NPP-ni rime kataniko mesokani ong·enga,” ine Meghalaya Pradesh Congress Committee (MPCC)-ni working president aro Mawryngkneng by-poll-na Congress dolni convenor ong·enggipa Ampareen Lyngdoh parakataha.
NPP dolo da·o tangkarang bang·ahani gimin ia by-election-oba bang·bea tangkarangko jakkalenga ineba MPCC-ni working president matnangataha.
Lyngdoh-ni aganani gitade, Mawryngkneng-o pu·ongiparangko pipraatna gitasa NPP, Marboh-ko susachina didiaha.
Mawryngkneng-o da·oba Congres dolni mongsonggipa dilgiparang aro kamko ka·enggipa manderangde nangrimen dongenga ine janapatengon, Congress dolni mitam manderangsan Marboh baksa doloni ong·kataha ine Lyngdoh parakataha.
Mawryngkneng constituency-o pu·ongiparangko salna gita mitam dolrang, tangka paisarangko jakkalgen indiba Mawryngkneng constituency-ni manderang an·tangtangni vote-rangko simsakesa on·gen ineba MPCC-ni working president, an·tangni ka·dongchakenganiko parakataha.
MDA sorkarini kosako manderang suk ong·tokjaengani gimin Mawryngkneng by-election-o Congress dolni candidate Highlander Kharmalki cholrang nambatenga ineba Lyngdoh parakataha.
Mawphlang by-election-o NPP-ni candidate ong·e susaenggipa Lamphrang Blah-ni gimin janapatengon, ua election-o susana nangnikenga ineba agangijasa Congress-oni ong·kataha ine MPCC-ni working president parakataha.
“Angni chanchiani gitade ia gitcham MDC, by-election-o susana gita NPP baksa tik ka·gimin dongachim,” ine Lyngdoh aganaha.
Indake ong·engon, Rajabala by-election-o UDP-ni candidate ong·e susaenggipa Ashahel D Shira-ba Congress dolni tikitna dorgasto gala dongjachim ine Lyngdoh parakataha.
“GHADC election-on UDP seat ge·sakoba man·jaha indiba ua ia by-election-o UDP doloni susana tik ka·aha,” ine Lyngdoh, an·tangni suk ong·gijaniko parakataha.
Rajabala-o NPP-oni ong·katgipa manderangba Congress dolna kam ka·skaengani gimin Rajabala by-election-o Congress dol cheani cholrang dongenga ineba ua parakataha.