TURA: Adita salrangna skang, North Garo Hills a·jao, Jharkhand a·doko Maoists bobil dolni manderangko warachake a·songtangna janggi on·chakgipa CRPF sipai saksani bimingchi rama dilsako biming mingani ja·man, Sukrobar saloba South West Garo Hills a·jao apsan dake a·songna janggitangko on·chakgipa CRPF sipai saksana skul damsako on·kangangskaaha.
2005 bilsini September 3 tariko, 87 Battalion CRPF-ni sipairang, Chattisgarh a·dokni Bijapur buringrango Maoists bobil dolrangko sandie re·bapilengmiting somoio CRPF-ni gari bolsako IED bomachi godape chadrapsoahachim aro bobil dolni boma godape chadrapanio CRPF sipai Sugandha Koch so·otako man·an baksana adita sak sipairang saknaanirangko man·ahachim. So·otako man·gipa Sugandha Koch-ara, South West Garo Hills a·jani Garobadha jolo donggipa Gandhipara songoni ong·achim.
Indake ong·engon, ia sipaiko gisik ra·na gita Sukrobar salo, uni songon Sugandha Koch Memorial Government LP School-ko South West Garo Hills a·jani Deputy Commissioner Ch Ramakrishna-ni jakchi kulie on·angaha aro ia skulko kulie on·angani somoio SWGH a·jani SP Siddharth Kumar Ambedkar, CRPF-ni official-rang aro sianggipa sipaini ma·drangrangba dongpae bak ra·angaha.
Skulko nokdonggana skang, South West Garo Hills a·jani Deputy Commissioner aro CRPF-ni official-rang, dingtangmancha sianggipa CRPF-ni sipaina mande ra·pilskaaniko dakangaha.
