Boma man·gipani bidingo CM-ni agangipa kattara bregiminni katta ong·ja: Pyngrope

SHILLONG: Re·anggipa October 4 tariko Lachumiere-o donggipa NPP office-o HNLC bobil dolni gopretgnigipa bomako donani bidingo badiaba political dolni jakmaba ong·na man·aiaha ine Chief Mininster Conrad K Sangamani agangipa kattarangara brigimin mandeni katta ong·ja ine ine Opposition Congress, Conrad-ni kosako matnange aganaha.
“Maikai aro maina uno gopretatna miksongaha a·selko sandikuenga. Boma man·ani mamlao political-ni jakmaba ong·naba donga ine chief Minister-ni agananiara namen gisik bregijani kamko mesoka” ine a·gipi Congress dilgipa, Charles Pyngrope aganaha.
HNLC bobil dolni bilakbataienganina ta·raken kam ka·na nangengaha ineba Pyngrope aganaha.
“Charles Pyngrope-ko man·chape jeba political dolni nangnikanina ong·gija, a·dokni namgnina police dol uamangni kamko ka·na nanggen.’’ Uamang a·dokni manderangko chel·chakna nanga, a·gipi Congress dilgipa aganaha.
A·dokni manderangko ka·dongatpiltaina kra-bewalo police ja·ku de·na aro meli-nangrime ku·cholsan kam ka·e uamangni kamko mesokna nangchongmota.
Sorkario minister-rangna HNLC ka·mik kenatani lekkarangko sokatani bidingo MLA ba Minister ong·chong uamang pilakan songsalni manderang aro a·dokni songpanggiparang ong·anio songpanggiparangko chel·chakna sorkarini dakgni ong·a, Pyngrope aganaha.
“Uni gimin bobil dakgipa dolni agangipa kattarangko namen kengni ong·anio jegalna nanga. Uamangni an·tantang ong·gija kattako agane namgija dakanio jean daitoko ra·jaenga ua namgijako dakgiparangni kosako ja·ku de·na de·na nanggen,’’ a·gipi Congress dilgipa aganaha.
Apsan obostani bidingo ian chu·gimik sorkarini chu·sokgijani ong·a aro political-ni gita CM-ni chanchiani namen gisik bregijani chanchiani ong·taiaha ine MPCC working president, Ampareen Lyngdoh aganaha.
“Uni party office-o boma donani political-ni gita jak dongnaba man·aia ine mai political theory-ko CM aganenga,’’ Lyngdoh aganaha.
Intelligence-ni changsatai chu·sokgijaniko Chief Minister chu·gimik namrengaha, ua agandapaha.
“Vice President, Venkaiah Naidu a·dokona sokbagipa ong·achim ua salo bomako man·aha. Social media-o bobil dol je kattako parakani ja·mano boma man·anio uamang mikrakna nangachim indiba dal·e ra·janio anga aganan man·jaha,’’ Lyngdoh aganaha.
Maiba ning·joljol sandigiparang sandianio chu·soktaijaha sorkari report-ko on·a nanga, MPCC president working president dabiaha.
“Boma gopretode mai ong·genchim sandia man·gijanio da·o namen kenani ong·enga,” ua aganaha. Ong·nasienggipa by-election-rangni bidingo election ong·enggipa biap gimiko police dol dongenma dongjawa ba sorkario manderangni ga·timrarangkosan uamang ja·rikaigenma anga ma·sijaha, MPCC working president aganaha.