TURA: Rajabala Deficit Secondary/Higher Secondary School-o niamgri principal kamna rimnapa ine matnange West Garo Hills district-o ga·akgipa Rajabala jolni manderang Director of School Education and Literacy (DSEL), Shillong-na badi ka·aha.
Jolni manderangni matnangani gita uamangna u·iatani gita Tura DSEO, Ela Begum Sarkar-ni ra·chakanichi aro skulni ad hoc committee-rangni manchianichi niamgri junior aro under-qualified skigipako principal kamna rimnapaha ine jolni manderang matnangaha, ine DSEL-na badi ka·gipao seaha.
Tura DSEO 2020 bilsini August 3 tariko ge·etataniko pe·e rai on·aha ine jolni manderang aganchakaha, jeon gimik dakgipa kamna rimnapanio aro promotion on·anio DSEL-ni rai on·nani grigipako dontongna gita nanggen ine DSEL-oni ge·etataha.
“Skigipa jean kamo ra·doako man·gipa high-school pass ka·gipasan ong·aia indake ua maidake BA, aro B.Ed degree dongpilgipa vice principal aro B.Ed degree donggipa adita a·gipi skigiparangni kosako ga·changbate kamko ka·na gita man·gen. Uni gimin ia niamgri kamona rimnapgipako ra·galna gita nanggen aro kragipa skia-poraia donggipa skigipakosa kamona rimnapskana gita nanggen,” ine jolni manderang aganaha.
Re·anggipa chango apsandakgipa obosta jeon Hawakhana Deficit Secondary School, Tura-o niamgri headmistress kamna rimnapani gimin DSEL-ni ge·etatani gitade DSEO-ni ning·o donggipa gimik skulrang, DSEO office-oni rai on·nani gri indake niamgri skigipani kamna rimnapaniko aro kamo ra·doaniko dakjachina.
Rajabala-o, niamgri skulni principal kamna rimnapa ine jolni manderang matnanga
Date:
Share post:
