TURA: Selsella C&RD Block-ni block development officer (BDO) kamtangchi tik ong·e re·jaengani a·sel bang·a kamrangan matchotgija dongna nangtokenga ine jolni dingtang dingtang NGO-rang matnangenba, Mongolbar salo Selsella C&RD Block office-ko kam ka·na on·gija champengataha.
Iani bidingo ASWA Selsella unit, ASWA Balachanda unit aro GSMC Selsella unit-ni Chief Minister-na sedoatengon, Selsella block-ni BDO kamtangchi re·a tik ong·jaengani a·sel dingtang dingtang kamrangko ka·anio songni nokni manderang neng·nikanirangko chagrongna nangtokenga aro VEC secretary-rangni, job card holder-rangni aro Selsella jolo songdongenggipa manderangni bang·a kamrangan matchotchipna man·jaenga ine NGO-rang matnangataha.
“Ia officer, an·tangni skani gita office-ona uni re·baaniko sedapnaba gnang indiba ia office-ona rang·gitik re·bae nigenchimode bang·bata somoirangon uko office-o nikjawa. Uni gimin ia officer-ni kosako rakgipa ja·kurangko de·china aro uni biapo Selsella block-na kamo gisik nanggipa officer-ko on·skachina chinga mol·molenga,” ine Chief Minister-na sedoatgipa chittio NGO-rang parakataha.
Indake ong·engon, ia BDO-ni kosako nanga gita ja·kurangko de·china aro Selsella Block-na gipin BDO-ko on·skachina gitaba NGO-rang, a·dokni Chief Minister-ko didiataha.
