TURA: Adita salrangna skang, Tura Bazar-o donggipa dokkan ge·saoniko tangka dabie, dokkan nokgipa aro dokkano kam ka·giparangko kragija dake doke donangahani gimin All Garo People’s Federation (AGPF) raken jegalatenba, dolni bimingo iandake kragija kamrangko ka·gipa manderangna AGPF mikrakataniko on·angaha.
Koborko on·ani gitade, re·anggipa October-ni 8 tariko ma·sina man·gijagipa manderang, Tura Bazar-ni gital Council building-o dokkan dakenggipa Arvind Prasad-ni dokkanona re·ange, All Garo People’s Forum (AGPF) dolni bimingo tangka dabieahachim aro dokkan nokgipa uamangna tangkako on·na jechakon, ia manderang, uko aro dokkano kam ka·enggipa gipin manderangko kragija dake doke donangahachim.
Indake ong·engon, AGPF dolni bimingo ong·gija kamrangko ka·e dolna namgija bimingko ra·baenggipa manderangko sandie, AGPF dolni manderang raka ja·kurangko de·gen ine AGPF-ni president JR Marak, mikrakataniko on·angaha.
“Ia a·selni bidingo koborko man·soe anga dokkanni CCTV camera-o man·rikgipa video-ko nieon, uano ong·gija dakgipa manderangara chingni manderang ong·jachim ine anga nikaha. Uni gimin je manderangan AGPF-ni bimingo ong·gija kamrangko ka·e chingko bodnam ka·na jotton ka·engachim, uandakgipa manderangni kosako chinga rakgipa ja·kurangko de·anggen,” ine AGPF-ni president parakataha.
Da·o dipet AGPF-ni ning·o kam ka·enggipa manderang saksaba namgija kamko ka·e doltangna bodnamko ra·baa dongkuja aro mikkangchiba iandakgipa kamrangko ka·jawa ineba Marak, talataniko on·angaha.
“Uni gimin mikkangchiba iandake AGPF-ni bimingo gila kem·anirangko dake ba bazar antirango ong·gija kamrangko ka·taigenchimode chinga jrip nie dongjawa,” ine AGPF mikrakataniko on·angaha.
