TURA: West Garo Hills a·jani Rondupara aro Dimakgre songrango rama jal·langrangko tarie on·an baksana manderangko sanne banne on·gipa primary health centre (PHC)-ko rike on·china gita Garo Students Union (GSU) Phulbari unit, a·dok sorkario dabiangaha.
Iani bidingo Meghalaya a·dokni Chief Minister Conrad K Sangma-na sedoatengon, Rondupara-oni Dimapara-ona dakanggipa RCC dolongko rike on·china aro Rondupara songo PHC-ko rike on·china gita GSU Phulbari unit didiataha.
“Ia song damgnian Phulbari, Dadenggre aro Tikrikilla-oni chel·grikani gimin batanggimin somoirango sagiparangko health care centre-rangona ra·angani somoirango manderangni sianirangko nikna man·aha. Uni gimin ia songo sagipa manderangko sanchakna gita PHC damsako aro RCC dolongko rike on·china chinga mol·molenga,” ine GSU Phulbari unit-ni president, Francewell Marak, Chief Minister-na seatgipa chittio parakataha.