Assam-M’laya-ni simarango meligrikgijaniko Cong agangrikna pa·chija ine NPP matnanga

 

SHILLONG: Assam aro Meghalaya a·dok damgnini simarango meligrikgijanirangko namatna gita ia a·dok damgnion Congress sorkarirang agangrikna gita pa·chipjahachim ine Mongolbar salo, National People’s Party (NPP)-ni national vice president aro Meghalaya a·dokni Deputy Chief Minister Prestone Tynsong matnangataha.

Mongolbar attamo, Mawryngkneng Assembly constituency-ni by-election-o NPP-ni candidate ong·e susaenggipa Pyniaid Sing Syiem-na campaign-ko ka·angengon, ua 2003 bilsi dipetan MLA ong·e aro 2013 bilsi dipetan minister ong·e, ia a·dok damgnini simarango meligrikgijanirangko Congress dol changsaba namatna jotton ka·jaha ine ua nikna man·aha ine Tynsong aganaha.

Ia a·dok damgnini gisepo ru·utbea bilsirangna meligrikgijani bidingo agangrikna gita Meghalaya a·dokni gitcham chief minister DD Lapang aro Assam-ni gitcham chief minister Tarun Gogoi, apsan gonggrikahachim ine janapatengon, a·dokni damgnini chief minister-rangan ua somoio iani bidingo agangrikgija cha ringmangmange a·doktangona re·bapilaiaha ine Tynsong matnangataha.

“Bilsi 40 ong·na sipile Congress dol, a·dokko sason ka·aha indiba changsaba a·dok damgnini gisepo meligrikgijaniko namatna jotton ka·jaha,” ine ua aganaha.

Indake ong·engon, ia a·dok damgnini simarango songdongenggipa manderangni namgnina ia meligrikgijaniko NPP-chi dilenggipa MDA sorkari namatna gita kang·kare kamanaha ineba a·dokni Deputy Chief Minister parakataha.

Them Iew Mawlong-ni Harijan Colony-o songdongenggipa manderangko apjitatna manchienggipani gimin janapatengon, iako Chief Minister Conrad Sangma-ni election-na chalakki dakanisa ine Congress dolni matnanganiara namen kragijani ong·aha ine Tynsong parakataha.

“Chinga ia biapo songdongenggipa manderangko gipin biapona apjitatbebenasa kam ka·enga aro angni dilanichi high level committee-ba iani bidingo sorkarina report-ko on·manaha,” ine ua aganaha.