SHILLONG: Meghalaya a·dokni damgittam Assembly constituency-rang, chong·motan Mawryngneng, Mawphlang aro Rajabala Assembly constituency-ni by-election-ko re·baenggipa October 30 tariko ong·atna gita Election department, kamrangko ka·soengahaon, ia by-election-o butchuma budeparang, COVID-19 man·gipa manderang aro be·enni gita cholgri ong·gipa manderangba dilgiparangko seokanio bakko ra·pana man·na gita Election department, dingtangmancha 12D form-ko jakkalanggen.
Meghalaya a·dokni Chief Electoral Officer (CEO) Frederick Kharkongor-ni u·iatani gitade, da·o dipet uamang Mawryngkneng constituency-oniko king 132, Mawphlang constituency-oniko king 144 aro Rajabala constituency-oniko king 54 12D application form-rangko man·soaha.
Ia 12D form-ni gimin talataniko on·angengon, ian bilsi 80 batgimin butchuma budeparang aro COVID-19 man·e ba be·enni gita cholgri ong·e noktangtango dongna nangenggipa manderangna, noktangtango donge dilgiparangko seokanio bakko ra·pana man·na gita tarigimin form-rang ong·a ine CEO parakataha.
By-election ong·atna sienggipa damgittam constituency-o gimik dam 168 polling station-rang gnang aro ia dam 168 polling station-rangoni dam 47 polling station-kode kenchakna nangbatgipa polling station ine Election department minge donaha. Ia dam 168 polling station-rangon COVID-19-ni niamrangko ja·rikna man·na gita dingtangmancha COVID nodal officer-rangkoba dongen ine u·iataha.
Ia damgittam by-election-ko October 30 tariko ong·atenba, vote-rangko November-ni 2 tariko chanskana siengachim.