SHILLONG: Rajabala constituency-ni manderang namroro silroroaniko nangnikenga ong·ode aro an·tangtangni neng·nikanirangko bon·atna sikenga ong·ode ia by-election-o BJP-na pu·ongen ine BJP-ni state president Ernest Mawrie parakataha.
Rajabala Assembly constituency-ni by-election-o BJP-ni candidate Kingstone B Marak-ko seokchina gita Rajabala constituency-ni manderangko didiatengon, indita bilsirangna Rajabala-o maming namroro silroroanirang dongkujaenga aro ia constituency-na dingtanganiko nangenga ong·ode manderang BJP-na pu·onchina ine Mawrie parakataha.
“Rajabala-o mamingni gita namroro silroroaniko nikna man·jaenga. Ia constituency-o ramarangba dongja aro manderang ringrangosa songre songgabatna nangenga. Uni gimin ia constituency-ni manderang, ia neng·nikanirangko bon·atna nangnikenga ong·ode chingna pu·onchina,” ine ua aganaha.
Rajabala-o bilsiantian chirang banrongengani a·selba manderang neng·nikanirangko chagrongna nangtokenga indiba da·alonan ia neng·nikanirangko namatna man·kujaenga ineba BJP-ni state president parakataha.
Rajabala by-election-na campaign ka·ani bidingo janapatengon, ia by-election-na campaign ka·na gita BJP-ni dal·dalgipa dilgiparang ia jolona re·angaha aro dingtang dingtang biaprango, COVID-19-ni niamrangko ja·rike tom·bimonganirangko ong·atenga ine Mawrie parakataha.
October 27 tarikonan chonchongipa tom·anirangko ong·atangkugen ine janapatengon, ia by-election-o BJP dol chegipa ong·na ka·dongenga ine Mawrie parakataha.
BJP state president-ni parakatani gitade, Rajabala by-election-na BJP-ni MLA Sanbor Shullai, BJP-ni vice president aro Tura-ni MDC Bernard Marak baksana gipin dilgiparangba campaign-ko ka·enga.