TURA: Rajabala constituency-ni gitcham MLA aro an·tangni segipa Dr Azad Zaman-ni matchotgija donanggipa kamrangko matchotatgen ine Robibar attamo, Rajabala by-election-o Congress candidate ong·e susaenggipa Hashina Yasmin Mondal, Rajabala-ni manderangna ku·mikchetangaha.
Robibar salo, Rajabala Assembly constituency-ni ning·o donggipa Bhaitbari-o Congress dolni tom·bimonganiko ong·atanio ua ia ku·mikchetaniko dakangaha.
An·tangni segipani kamrangni gimin janapangengon, Dr Zaman sagi, Rajabala constituency-ni manderangna ka·sagipa ong·e wal sal kamko ka·achim indiba rasong gribee ua da·alo a·gilsako dongjaha ine Mondal, mikchi ong·e aganangenba, uni matchotanggijagipa kamrangko matchotate on·skana gita ia by-election-o uko seokchina Rajabala constituency-ni manderangko didiangaha.
Una skang, Rangsakona-ni Congress MLA Zenith Sangma-ba jinmana aganprakangengon, NPP-chi dilenggipa MDA sorkarini kamrangna NPP dolko matnange aganangaha.
NPP-ni candidate Abdus Saleh-ni kosako matnange aganangengon, uni Mahendraganj constituency-o MLA ong·engmiting somoio ua maming namgnirangko ra·bana man·jaha aro Mahendraganj constituency-ko reserved seat dakatani ja·man ua Rajabala constituency-ona apjitbaskae susaengoba chu·sokgipa ong·na man·kujaenga ine Sangma parakataha.
Ia tom·bimonganio Meghalaya Pradesh Congress Committee (MPCC)-ni president Vincent Pala-ba dongpae jinmana aganprakangengon, Meghalaya a·dokni damgittam constituency-rango by-election-ko ong·atenga aro ia damgittam constituency-rangkon Congress chena ka·dongenga ine parakataha.
“Khasi Hills-o Mawryngkneng aro Mawphlang Assembly constituency-ni by-election-ko ong·atenga aro ia damgni seat-rangkon chinga chetelaigen. Garo Hills-oba Rajabala by-election-ko ong·atengani gimin chinga ia seat-koba chena ka·dongenga,” ine Bhaitbari-o hajal kotok manderangna Pala aganaha.
MDA sorkarini kamrango manderang kusi ong·tokjaengani gimin ia damgittam by-election-kon Congress chena ka·dongenga ineba ua aganaha.
“Meghalaya a·doko songdongenggiparangoni 80 percent-de game ge·e cha·giparangsa ong·a indiba game ge·e cha·giparangna maming dakchakanirangko sorkari on·na man·jaenga aro game ge·e cha·giparangonikosa tangka paisarangko dabie ra·skaenga. Meghalaya a·doko songdongenggiparangoni 60 percent-de chadamberangan ong·a indiba ia chadamberangna sorkari janggi tangani cholrangko aro maming dakchakanirangko on·na man·jaenga,” ine MPCC-ni president aganaha.
Meghalaya a·doko aro mongsongbate Khasi, Jaintia Hills a·jarango chadamberangna janggi tangani cholrangko on·ani pal ia sorkari, wine store-rangkosa kuliroroskae chadamberangko nosto ka·skaenga ineba Pala matnangataha.
NPP-chi dilenggipa MDA sorkario aganna gita maming kamrang dongja indiba dingtang dingtang jat aro toromni manderangko ma·ekatnasa jotton ka·enga ineba Pala matnange aganangaha.
