TURA: NPP dolko Congress baksa nangrime sorkari rikna aganachim ine a·dokni Deputy Chief Minister aro NPP-ni dilgipa Prestone Tynsong-ni agananiko a·dokni gitcham chief minister aro Opposition dolni dilgipa Mukul Sangma jegalatskaenba, NPP dolde Congress dol baksa bakrimna kragipa dol ong·ja ine a·kangatskaaha.
“Badia Dr Mukul Sangma-ko ua (Tynsong) aganenga? Ia Dr Mukul Sangma-de Prestone Tynsong-ko grongaba dongkuja aro uko grongna skaniba dongja,” ine Sangma, re·anggipa Robibar salo, Congress dolni election-na tom·bimonganiko Bhaitbari-o ong·atani ja·man, kobor ra·timgiparangna aganaha.
Conrad K Sangma-chi dilenggipa NPP sorkarikoba ua tangka jakkalsreta aro a·dokni man·e cha·aniko tang·onataha ine matnangataha.
“Tynsong-ni a·kangani gita chinga maming dakeba uamang baksa nangrime sorkariko rikani katta nakatja. Kakketko agangenchimode manderang ia sorkarini bon·anikosa senge dongtokengaha,” ine CLP-ni dilgipa aganaha.
Sangma-ni parakatani gitade, ia sorkariko chalaianio pilak kamrangan namsrangjaengani giminsa a·dokni manderang ia sorkariko matnangtokengachim.
“Jekoba sing·aibo, Khasi, Jaintia ba Garo Hills-ni manderangko. Uamangoni bang·batan ia sorkarini bon·anikosa nangniktokengaha,” ine Mukul Sangma aganaha.