SHILLONG: Meghalaya a·dokni damgittam Assembly constituency-rango by-election-ko ong·atengani gimin election official-rang, jakchakpilgija kamrangko ka·na a·bachengtokengaha.
Ia damgittam by-election-ko October 30 tariko ong·atengani gimin da·o salgittammangsan dongaiaha aro uandaken ia damgittam constituency-rango donggipa polling station-rangkoba tarisamsoanirang da·o matchotangaha.
Meghalaya a·dokni Chief Electoral Officer (CEO) FR Kharkongor-ni u·iatani gitade, ia damgittam Assembly constituency-rango kenchakna nanggipa aro simsakbatna nanggipa gimik dam 47 polling station-rang donga aro ianoni dam 29-de Rajabala constituency-on ong·enga. Kenchakna nanggipa aro simsakbatna nanggipa dam 47 polling station-oni dam 80-de Mawryngkneng constituency-o aro dam 10-de Mawphlang constituency-o ong·skaenga.
Budbar salo a·dokni Chief Electoral Officer an·tangan, ia kenchakna nangenggipa polling station aro model polling station-rangkoba nieaha ine u·iataha.
COVID-19-na dongimin niamrang dongani gimin ia damgittam constituency-ni ning·o donggipa pilak polling station-rangon nanga gita biaprangko tarisomanaha ineba Kharkongor parakataha.
“Pu·ongiparangna aro polling official-rangna naljokanirangko on·an baksana election-ko name matchotatna man·na gita niamrangni gimin pilaknan agan-talate on·manaha,” ine CEO parakataha.
Pu·onani somoio sak 1000-na baten apsan biapo pu·onna nangjana gita Rajabala-o dam 17 aro Mawryngkneng-o dam 7 polling station-rangko kulidape on·aha ineba Kharkongor parakataha.
Ia damgittam by-election-o chel·chakanirangko on·na man·na gita ma·mongoni dolbri sipai dolrang baksana Home Guard-rangko aro a·dokni police-rangkoba rimdapaha ineba ua aganaha.
Sikdepe pu·onaniko October 30 tariko ong·ate ia by-election-ni result-rangko re·baenggipa November 2 tariko parakna siengachim.