TURA: Garo Hills-ni State Highway (SH-12) rama gita Bangladesh a·songona ro·ongrangko salruraengani a·sel ia ramao bang·en a·sel ong·anirangko aro rama jal·langrangni nosto ong·roroangenganiko nikna man·engani gimin South West Garo Hills a·jani dingtang dingtang NGO-rang, songni nokmarang aro jolo songdongenggipa manderang baksa ia rama gita ro·ong salgipa truck garirangni re·ruraaniko jegalna Budbar salo, Ampati Mini Stadium-o jinma tom·bimonganiko ong·atenga ine u·iataha.
Koborko on·ani gitade, ia tom·aniko South West Garo Hills a·jani GSU, AYWO, FKJGP, AYC, AHAM, GSMC, AAYF, ADE aro uandakgipa dolrang nangrime ong·atenga aro ia tom·bimonganio bakko ra·echina gita NGO-rang, ia ramao donggipa dingtang dingtang songni nokma gaonburarang, me·chikma dolrang, bazar committee-rang, self help group-rang, VEC-rang aro jolo songdongenggipa manderangkoba bak ra·echina gita okamatenga.
Ia tom·bimonganiko ong·atengani gimin talataniko on·angengon, ia rama gita salantian Bangladesh a·songona ro·ong salruragipa garirang skatang salruraengani a·sel batanggimin somoirango bang·en a·sel ong·anirangko, manderangni sianirangko aro rama jal·langrangni nosto ong·roroangenganiko nikna man·engahani gimin mikkangchi ia rama gita ro·ong salruragipa garirangni re·ruraaniko chu·gimik champengatchina dabina ong·atenga ine Ampati-ni NGO-rang parakataha.
Indake ong·engon, Garo Hills-o donggipa a·ningni bosturangko iandake salantian gipin biaprangona palgalataiode mikkangchi Garo Hills-o ro·ong an·chengrangkon nikna man·jawaha ineba NGO-rang, iandake Garo Hills-ni gamchatgipa bosturangko gipin a·songrangona palgalaniko champengna nangengaha ine parakataha.
