TURA: COVID-19-ni a·sel online ba internet gita NEHU-ni porikkarangko ong·atanio bang·bata chatro chatrirangkon absent ine sean baksana mitam chatro chatrirangde mark-rangko man·jaengani gimin FKJGP Tura Government College cell, suk ong·gijaniko parakataha.
FKJGP TGC cell-ni parakatani gitade, COVID-19-ni giproroaniko champengna gita NEHU-ni ning·o donggipa dingtang dingtang college aro gipin institute-rango online exam-rangko ong·atengoba result-rangko parakani somoiode ia college-rango bang·bata chatro chatrirangan chu·sokgipa ong·na man·tokjaengachim.
“NEHU-ni porikkarangko online gita ra·anio bang·bata college-rangon nitimgipa ba invigilator-rang dongjae chatro chatrirangni porikka seanirangko name nirokna man·jaenga aro uandaken porikkani result-rangko parakatode dingtang dingtang a·selrangko pa·sike chatro chatrirangko fail ong·atenga,” ine FKJGP TGC cell-ni chairman Jaksram A Sangma parakataha.
Tura Government College-o semester porikkarangko ra·anioba skatang ra·a gita ong·engani a·selan result-rangko parakani somoiode sak 200-mangni chatro chatrirang chu·sokgipa ong·pana man·jaha ineba FKJGP TGC cell parakataha.
FKJGP TGC cell-oni parakatani gitade, chatro chatrirangni assignment-rangko lecturer-rangna submit ka·anioba dingtangmancha website-rangko on·soa dongjani a·selan chatro chatrirang, an·tangtangni assignment-rangko lecturer-rangni email address-rangona ba Whatsapp application-rang gitasa on·tokna nangengachim.
Iandakgipa a·selrangchi chatro chatrirang neng·nikanirangko chagrongna nangtokenga ine janapatengon, iani bidingo jako ra·e maikoba dakchina gita Tura-ni ja·delgimin manderangko FKJGP TGC cell didiataha aro ia neng·nikanirangko ta·raken niatchina gita NEHU aro Tura Government College-ni dilgiparangkoba didiataha.
