TURA: October 28 tarikoni November 1 tarikona Chhattisgarh a·dokni Raipur-o ong·atanggipa National Tribal Dance Festival-o A·chikrangoniba Dokkaku Arts & Cultural dolni gita re·ange bakko ra·angpaaha.
Ia festival ba manianiona Dokkaku Arts & Cultural dolko uamangni dilgipa Chennang A Sangma dilangaha aro ia dolo gimik sak 15 A·chik chadamberang re·ange bakko ra·eaha.
Koborko on·ani gitade, ia National Tribal Dance Festival-o India a·song gimikoni dol 46 dingtang dingtang Tribal jatrang aro gipin a·songrang jekai, Uganda, Sri Lanka, Palestine, Uzbekistan, Nigeria, Mali aro uandakgipa a·songrangoniba re·bae bakko ra·angaha.
Ia festival-ko ong·atanio a·songni gitcham Union Minister Jairam Ramesh, Indian National Congress-ni membor Randeep Singh Surjewala, Chattisgarh-ni Chief Minister Bhupesh Baghel, Tourism Minister Tamradhway Sahu, Culture Minister Amarjeet Bhagat, Karnataka-ni gitcham minister DK Shiv Kumar aro gipin dilgiparangba bakko ra·angtokaha aro ia Tribal Dance Festival-o nambate chrokgiparangna boksisrangko on·angaha.
Garo Hills-oni re·anggipa Dokkaku Arts & Cultural dolni gitaba ia manianio dingtangmancha Wangala chrokaniko mesokangaha.
