NEW DELHI: Meghalaya-ni ge·gittam Assembly seat-rangna by-election ong·atgipani result-rango mijalo chane parakatani ja·mano Congress, seat ge·sakoba man·rikjaomangba, unaskang ong·atgipa poll-rango Congress-ni vote man·anirangko nigrikatgenchimode ian chango uamangni vote man·anirang tang·dobatahani gimin uamangni tang·dobagniko niksoaha ine party koboro parakaha.
“Chingni dilgiparang aro memborrang raken kamrangko ka·aha, indiba chingni kosako chakatgipa candidate dongani gimin vote-rang sualani a·sel chinga sirikaha” ine poll incharge-ni dal·batgipa office bearer-rangoni saksa aganaha. Ian da·oni MDC-rangni, Block Congress dilgiparangni bon·kamgipa somoio party-ko wate katangani a·sel vote-rang sualaha ineba ua aganaha.
MPCC President Vincent H Pala, jean da·omitingo a·palchisa ong·engachim, uni re·bapilo party President Sonia Gandhi-ko grongenba by-poll result-rangni bidingo talate on·enaba gnang. Unomitingo BJP-chi sason ka·enggipa Himachal Pradesh-oba by-poll ong·atgipa assembly seat ge·bri gimikkon Congress ka·dongsona man·pilgija cheaha, jeon Rajasthan aro Maharashtra a·dokrangoba bang·a bang·ja seat-rangko cheahachim.
Indake ong·engon, party adita meligrikgijani ong·ani giminba aroba badiaba candidate-rangna party tikit on·jani a·sel bon·kamgipa somoio party-oni ong·kate susaani a·selba, voter-rang bak dakahani gimin Congress-ni sirikani ja·pangde ong·ahakon ine party dilgipa saksa aganaha.
