SHILLONG: Congress dolni ning·on dilgiparangni gisepo meligrikani dongjani a·selsa Meghalaya a·dokni by-election-ko amako man·aha ine Congress dolni dilgiparang ku·rachakaha.
“Oe beben dolni ning·o dilgiparang meligrikna man·jani a·selba chinga ia by-election-o amako man·aha indiba Meghalaya a·dokni politics-o tangka paisa jakkalanikoba an·ching gualna gita nangja,” ine Mongolbar salo Meghalaya a·dokni damgittam by-election-ni result-rangko parakatani ja·man Congress dolni dilgipa Ampareen Lyngdoh aganaha.
Meghalaya a·dokni damgittam Assembly constituency-rang, chong·motan Rajabala, Mawryngkneng aro Mawphlang constituency-ni by-election-ko Meghalaya Democratic Alliance (MDA)-an chegopahachim ine nikna man·a. Rajabala aro Mawryngkeng seat-rangko National People’s Party (NPP) cheaha aro Mawhlang seat-ko United Democratic Party (UDP) cheskaahachim.
Indake ong·engon, ia by-election-o dingtang dingtang dolrang, bang·en tangka paisarangko jakkalaha ineba Lyngdoh matnangattaiaha.
Lyngdoh-ni aganani gitade, by-election-ni result-rango bang·e dingtanggrika dongjani gimin vote-rangko salna gita tangka paisarangko jakkalaha ine ma·sina man·ahachim.
“Iako agangenchimode NPP ba gipin dolrangba maina FIR-ko ka·jaenga ine aganaba gnang. Indiba darangan uamangni tangka jakkalsretaniko parakna ong·katjawani gimin FIR ka·eba orto dongjawa,” ine Congress MLA aganaha.
Ia by-election-oniko Congress MLA aro MDC-rang skie ra·na gita nanga maina MDA-ni miksonganian Congress doloni katgipa MLA ba MDC-rangko dingtang dingtang biaprango Congress dolni kosako cheatna jotton ka·ani ong·enga ineba Lyngdoh aganaha.
Ia by-election-ni result-rangara Congress dolni MLA-rangko gipin political dolrangko napskachina didiani gita ong·genma ine sing·on, ia by-election-o Congress dol hajal vote-rangchi ong·ja indiba bang·gija vote-rangchisan amako man·aiahani gimin Congress dolko bon·angengaha ine aganna man·jawa ine Lyngdoh parakataha.
Congress dolo ka·donge Congress-na chakpaenggipa manderangkoba ua mittelpilangaha.
Congress dol bilakbataina gita bilsignimang nangkunaba gnang ine janapatengon, Congress dolni dilgiparang ka·donganiko watgalkujawa aro 2023 bilsini Assembly election-na skang an·tangtangko gital daktaigen ine Congress MLA parakataha.