SHILLONG: Adita salrangna skang matchotanggipa Rajabala Assembly constituency-ni by-election-o National People’s Party (NPP)-chi dilenggipa MDA sorkari, Congress dolni kosako a·dokna on·gimin bilrangko jakkalsretaha ine Congress dol matnangataha.
Iani bidingo kobor ra·timgipa manderang baksa agangrikengon, Rajabala constituency-o bilo ong·enggipa dol, sorkarini bilrangko jakkalsretaha ine Congress dolni dilgipa Mukul Sangma matnangataha.
By-election-na campaign ka·ani bon·kamgipa salo NPP aro Congress dolni gisepo dinggrikgipani gimin janapatengon, ia a·selni bidingo district administration aro police-rang kakketko sandichengna nangachim ine Sangma parakataha.
Mukul Sangma-ni parakatani gitade, ia a·selni bidingo Congress dolni kosako FIR ka·ani ja·man, police-rang Congress dolni dilgiparangko aro kam ka·giparangkosa rim·na sandiaha aro Congress dolna kamko ka·enggipa bang·a manderangan, rim·a man·na kenenba ua somoio noktangtangoni katbrange dongtokaha.
Ia dolgnini dinggrikaniko Congress dolna kam ka·enggipa manderangsa a·bachengonin chanchisoe dakaha ong·ode maini a·sel Congress dolni bang·bata manderangan saknaanirangko man·na nangaha ineba Sangma sing·doangaha.
“Sawa iako dakaha? Returning Officer-ni report-ko taridapaha aro iako name ning·tue sandina nangenga. Chinga iani bidingo ning·tue sandina ja·kuko de·gen,” ine Sangma parakataha.
Ia dinggrikaniko NPP dolsa a·bachengataha ineba ua matnangataha.
“Ian NPP dolni chanchisoe dakanisa ong·aha. Uamang dolgnini gisepo dinggrikaniko ong·ate, Congress dolna kam ka·enggipa manderangni kosako FIR ka·aha aro chingni manderangko rim·na uamangni nokrangko chadrapeaha,” ine Congress Legislature Party (CLP)-ni dilgipa parakataha.
Election-ko jakgitelani gnang aro nama bewalo ong·atna gitade Election Commission-ni ning·o kam ka·enggipa officer-rang, niam gitasa kamko ka·na nanga ineba ua aganaha.