SHILLONG: Chief Minister Conrad Sangma, Deputy commssioner-rang baksa Meghalaya-o tikka su·a man·ani bidingo chanchi-rimangaha aro Krismasna skang 100 per cent-nan tikka su·a man·tokatna jotton ka·china uamangko ge·etaha.
Prime Minister Narendra Modi uni ru·utgija salo chief minister-rang baksa chanchirimmitingo tikka su·a matchotgniko niksam-soani gita Krismas-na skang a·doko 100% tikka su·ako chu·sokatna district-rango tikka su·ani kamrangko bilakbatatchina chief minister, district official-rangko aganaha.
Re·baenga sal 40-o a·doko lak 9 tikkarangko su·a man·atna ua nisan ka·aha.
Tanggitikgipa obosta ong·aniko agane, ‘‘An·-chingo bang·en manderang siangaha an·ching ua sal-rangko gisik ra·na nang-chongmota aro sabisiko simsakna an·chingo chu·-onga gita sana-banani cholrang dongja. Janggi-rangko jokatna an·chingni tikkelanirangko rakbatatna an·ching u·i-ma·sianiko jakkalna nangchongmota,’’ chief minister aganaha.
“Gittamgipa changna sabisi sokbanasienga, iana tikka su·achi janggirangko jokatani cholrangna kam ka·na an·ching miksongna nanggen,’’ ua agandapaha.
