SHILLONG: National People’s Party (NPP)-ni bang·a MLA-rangan suk ong·jae doltangoni ong·kate katna miksongtokenga ine Congress dolni a·kangatani ja·man, iandake agananiko NPP-ni state president aro Rajya Sabha-ni MP WR Kharlukhi jegalatskaaha.
“Chingni pilak MLA-rangan ku·cholsan ong·e dongtokenga aro rakbee kamrangko ka·enga. Darangba NPP-oni ong·kate katna nangani katta dongja aro ian uamangni chanchichipe agananisan ong·aia,” ine Kharlukhi aganaha.
NPP-ni bang·bata MLA-rangan doltangoni ong·kate da·o Assembly election-o gipin dolrangonisa susana miksongtokenga ine Opposition Congress dolni dilgipa Mukul Sangma parakatenba, NPP-ni national president aro a·dokni Chief Minister Conrad Sangma, Congress dolko matnangana bate iako ma·sie ra·on nambatgen ine aganahachim.
Indake ong·engon, NPP-ni MLA-rang doltangoni ong·katna miksongtokenga ine Mukul-ni agananiko NPP-ni state president jegalatskaenba, da·o dipet NPP-ni MLA-rang pilakan doltangon kusi ong·e dongtokenga ine parakatskaaha.
“MLA-rang suk ong·jana gita maming a·selrangko anga nikja. Manderangba NPP-ni kamo kusi ong·enga aro iani giminsa by-election-oba manderang chingko seokaha,” ine Kharlukhi aganaha.
Mikkangchi NPP aro Congress dolni gisepo bakrimani cholrang dongama ine sing·on, “Chinga maikai Congress baksa bakrimgen? Chinga an·tangtangni dolkosa rikenga aro gipinrangsa ching baksa bakrimnaba gnang,” ine Kharlukhi aganaha.
Congress dolni dilgipa Mukul Sangma baksana Congress dolni mitam MLA-rang aro NPP-ni mitam MLA-rangba Trinamool Congress (TMC) dolo napnaba gnang ine adita salranga skangsan kobor on·timgiparang u·iatahachim.