SHILLONG: Party-oni ong·katangna sikenggiparangko party, darangkoba champengna man·ja ine MPCC working president, Ampareen Lyngdoh aganaha.
Congress Legislature Party (CLP) dilgipa, Dr Mukul Sangma, Congress-oni ong·kate TMC-o napnasienga ingipa koborrang jangani gimin Lyngdoh, ia kattarangko aganaha.
“Party-oni saoba ong·katangoba maming ong·ja. Ian ge·sa democratic party ong·a, saoba party-oni ong·katnangna skode, uko ra·chakaia,” MPCC working president aganaha.
Ian ong·rongbewalan ong·aia, party dilgiparangni party-oni ong·kate kataniko skang 2017 bilsirangna skangonin nikbaenga ineba ua aganaha.
Uni aganani gitade, badiaoni sawarang ong·katnasiengachim, uko uamang u·ienga.
Indake ong·engon, NPP-ni manderang ong·kate katoba manderang jagokna nangjawa ineba Lyngdoh aganaha.
“2023-o dilgiparangni katruragniko anga niksamsoenga. Ian angni agansoanisan. Indakgipako Congress-an champengna man·aigen. NPP-ni bang·a a·gipi dilgiparangan 2023 Assembly poll-na skang ong·kate katna miksongtokenga,” Congress dilgipa aganaha.
Party-ni kosako ong·gija kamrangko ka·enba Rajabalao Congress-ni sirikani gimin party MLA-rang Dr Mukul-ko CLP-oniko ra·galna dabigenma ine sing·anina aganchakengon, ian uamangni chanchianisan ong·aigen aro iako uamang jinmani niknangraona ra·bana nangja ine Lyngdoh aganaha.
Dr Mukul, party-ni kosako ong·gija kamrangko ka·a ba ka·ja, a·selrangko nienga, iarangko a·gilsakna parakna nangani dongja, ian Congress-ni nokdangni kamsa,’’ Congress dilgipa aganaha.
