TURA: Jengjal-o donggipa Sub-Divisional Hospital-ni bidingo dingtang dingtang dolrang aro jolo songdongenggipa manderang ma·sisrettokengani gimin Sombar salo, manderangni ma·sisretanirangko talate on·na gita dingtangmancha tom·aniko ia hospital-o ong·atangaha aro ia tom·anio Meghalaya a·dokni Health Minister James K Sangma-ba dongpae bak ra·angaha.
Ia tom·anio a·dokni Health Minister James Sangma, jinmana aganprakengon, Jengjal jolrango an·o donggipa me·chikrang aro bi·sa bakgitchakrangni sianirang batengani gimin ia hospital-ko primary health centre (PHC) dake donaigija an·o donggipa me·chikrangna aro bi·sa bakgitchakrangna nambata sanna bananirangko on·na gitasa ia hospital-ko Sub Divisional Hospital-ona ra·doatskaenga ine parakangaha.
Ia hospital-o CMC Vellore-oni specialist-rang aro super specialist-rang kamko ka·e Garo Hills gimikonin sagiparangko nambate nirok sandiangna man·gen ineba ua parakangaha.
Ia hospital-ko private-public partnership (PPP) gadango chalaigenchimoba, iako sorkari hospital gitan chalaina siengani gimin ia hospital-o sannanirangko ra·enggipa manderang gipin sorkari hospital-rango gitasan gamna nangaigen ineba a·dokni Health Minister parakataha.
Ia hospital-ko da·o dipet bilsi 5-nasan PPP gadango chalaina tik ka·engkua aro manderangni gisepo jangbingbangenga gita NGO-rangna ia hospital-ko on·kama ong·kuja ineba Sangma parakataha.
Ia hospital-ko PPP gadango chalaina tik ka·ahani a·sel a·a on·gilgiparang aro kam ka·enggiparang noksan ong·atako man·gnok ine matnanganina talatangengon, a·a on·gilgiparangna sorkari kamrangko on·manaha aro sanction ka·gimin doctor aro gipin kam ka·giparangkoba dingtang dingtang biaprango donatskaaha ine Health Minister parakataha.
