TURA: Garo Hills-ni B Mahal-o donggipa a·arangko GHADC-ni chief executive membor (CEM) Benedic R Marak, pale cha·na miksongenga ine matnangtokengani gimin B Mahal-ko chel·chakna gita dingtangmancha ia jolrango donggipa dingtang dingtang dolrang, ‘Save B Mahal’ ine committee-ko songenba, Budbar salo jinma tom·bimonganiko North Garo Hills a·jani Solmari songo ong·atangaha.
Ia ‘Save B Mahal’ committee-ni secretary Bricks Marak-ni u·iatani gitade, adita salrangna skang, GHADC-ni CEM, doltangna kam ka·enggipa manderang baksa Pedaldoba Secondary School kal·chakramo tom·aniko ong·atangenba, ia B Mahal-ni bidingo talatanirangko on·angaha aro iani bidingo manderangna ma·sisretaniko on·enga ine NGO-rangko matnangangahachim. Ia tom·aniko ong·atani bidingo GHADC-ni CEM, NGO-rangna aro ia committee-nade u·iatgijasa ong·ataiahani gimin NGO-rang bakko ra·pana man·jaha ineba committee-ni dilgiparang parakataha.
“Chinga B Mahal-ni bidingo CEM baksa jera ra·grikna kusi ong·aigen aro ua jera ra·na nangnikenga ong·ode NGO-rangko aro committee-ko okamchina,” ine ‘Save B Mahal’ committee-ni dilgiparang ra·biatskaaha.