SHILLONG: Meghalaya aro Assam a·dokni simarango meligrikna man·jaenggipa biaprangko namatna gita songe on·gipa a·dok damgnini regional committee-rang, Sukrobar salo, Assam-ni Kamrup aro West Khasi Hills-ni ning·o donggipa adita biaprangko re·ange niangtaiaha.
Ia biaprangko nieanio Assam a·dokchipakni Kamrup regional committee-ni chairperson aro Assam Border Area Development Minister Atul Bora aro Meghalaya a·dokchipakni West Khasi Hills regional committee-ni chairman aro Meghalaya a·dokni PHE Minister Renikton Lyngdoh Tongkhar dilangskaaha.
“Chinga Kamrup aro West Khasi Hills a·jani Upper Tarabari, Gamerimura, Dobakdrop aro gipin songrangona re·ange songni manderang aro jolko dilenggipa manderang baksa agangrike, uamangni agan-ku·pattianirangkoba ra·baaha,” ine dolgni ia biaprangko nieani ja·man Assam-ni minister Atul Bora, kobor ra·timgiparangna parakataha.
Assam aro Meghalaya a·dok damgnini chief minister-rang, re·baenggipa November 16 tariko, ia a·dok damgnini gisepo meligrikna man·jaenggipa biaprangoni damsa Langpih songona re·anggen ineba Bora parakataha.
“Da·alo chingni ia biaprangko nieanide da·o a·dok damgnini chief minister-rangna skang re·angsoe nieani gitasa ong·enga aro da·alo chinga je chanchianirangko aro songni manderang baksa agangrikahachim, uani giminde ja·mano chanchirimanggen,” ine Bora aganaha.
Meghalaya a·dokchipakni PHE Minister Renikton Lyngdoh baksana ia biaprangona re·anggipa manderangara, MLA Macmillan Byrsat, MLA Kimfa S Marbaniang aro gipin official-rang ong·a aro Assam a·dokchipakni re·anggiparangara Bora baksana Boko-ni MLA Nandita Das aro gipin official-rang ong·skaachim.
Assam aro Meghalaya a·dok damgnini simarango meligrikna man·jaenggipa biaprangoni Langpih-ona ia a·dok damgnini chief minister-rang, re·baenggipa November 16 ba 17 tariko re·ange niegen ine adita salrangna skangsan, Meghalaya a·dokni Chief Minister Conrad K Sangma-ba parakatahachim.
Meghalaya aro Assam a·dokni gisepo meligrikna man·jaenggipa dam 12 songrangoni damdok biaprangko skanggipa bako namatchengna a·dok damgnini chief minister-rang tik ka·manahachim aro ia biaprangara, Meghalaya a·dokni West Khasi Hills, Ri Bhoi aro East Jaintia Hills a·jani ning·o donggipa Tarabari, Gizang, Hahim, Boklapara, Khanapara-Pilangkata, Ratacherra aro Assam a·dokchipakni Cachar, Kamrup Metro aro Kamrup a·jarang ong·engachim.