SHILLONG: Meghalaya a·dokna ma·mong sorkari, SSA scheme-ni ning·o gong kror 59 tangkarangko chame on·atchengahani gimin ia tangkarangchi SSA skulrango skigiparangna jagnini dormaharangko on·chengna a·dok sorkari tik ka·angaha.
Meghalaya a·dokni SSA skulrango skigiparang, re·anggipa June jaoni October jaona gimik jabongani dormaharangko man·tokkujaengachim ine nikna man·a.
Indake ong·engon, adita salrangna skang, Meghalaya SSA Schools Association (MSSASA)-ni dilgiparang, Education department-ni Secretary aro SEMAM-ni State Project Director Ambrose Ch Marak-ko grongeon, skigiparangna a·dok sorkari jagnini dormaharangko on·chengna tik ka·aha ine parakataha.
MSSASA-ni president Aristotle Rymbai-ni kobor ra·timgiparangna parakatani gitade, 2021-2022 bilsina chamgipa tangka paisarangoni skanggipa bako gong kror 59 tangkarangko re·anggipa November 10 tariko Education Ministry, Meghalaya a·dokna chamataha aro ia tangkarangchi SSA skigiparangna jagnini dormahako on·chengna sorkari tik ka·aha ine Education Official parakataha.
“Meghalaya a·dokni SSA skigiparangna jagnini dormaharanbgko on·chengna sorkari tik ka·aha aro bangki dormaharangkoba matchote on·na man·na gita tangka paisarangko chu·onga gita on·atchina a·dokni chief minister, ma·mong sorkariko didiatgen ine chingna sorkari officer-rang parakataha. Skigiparang da·o jabongani dormaharangko man·kujaengani a·sel bang·a neng·nikanirangko chagrongna nangtokengahani gimin chinga ja jagnini dormaharangko ra·chakna tik ka·aha indiba chingni man·na nangkuenggipa bangki dormaharangkoba ta·raken chingna on·skachina chinga sorkariko didiataha,” ine MSSASA-ni president parakataha.
Meghalaya a·dokni gimik sak 12,547 SSA skigiparangna japrakni dormaharangko on·na gita a·dok sorkari, komibeoba gong kror 26 tangkarangko nangengachim.