SHILLONG: Meghalaya a·doko Congress dolni dilgiparang, doltangko wate kattokna siengani gimin bilgribatanggnok ine agananiko Congress dolni dilgipa Ampareen Lyngdoh jegalatenba, a·doko Congress dol bilakbapiltaigen ine parakataha.
Lyngdoh-ni aganani gitade, Mukul Sangma-ko man·chape Congress dolni dingtang dingtang dilgiparang, doltangko wate katgenchimoba gital dilgiparangko man·pilna ka·donganirang dongskaenga. Congress doloni ong·katgrime kataniko champengna gita uamang rake kamko ka·gen ineba ua aganaha.
Congress dolni dilgipa aro a·dokni gitcham chief minister Mukul Sangma, an·tangna kakket ong·e dongenggipa gipin MLA-rang baksa December jani ja·man, Congress doloni ong·kate Trinamool Congress (TMC)-o napskana sienga ine koborrangko man·soahachim.
Dilgipa saksani ong·katanichide Congress dol bilgribatangjawa ine talataniko on·angskaengon, 2018 bilsini Assembly election-na skangba adita sak dilgiparang Congress doloni ong·kate katahaoba ia election-o Congress dol, dam 21 seat-rangko chena man·aiahachim ine Lyngdoh parakataha.
Bang·a constituency-rangon Congress dolni candidate-rangna senge dongenggipa manderang donga ineba Congress MLA parakataha.
By-election-o chu·sokgipa ong·na man·jani ja·man Congress dolni ning·o meligrikgijanirangko nikna man·engani gimin sing·on, iani bidingo Congress dolni gita ning·tue am·sandianirangko dakgen aro doltangoni saoba Congress dolni kosako kamko ka·enga ine nikgenchimode Congress dolni dongimin niamrango pangchake rakgipa ja·kurangko de·gen ine Lyngdoh parakataha.
Pilak dolrangan tang·ona tang·doanide dongaia ine janapatengon, a·doko dingtang dingtang dolrang Congress dolko bon·atsrangna jotton ka·engoba uamang bilakbapiltaiaigen ine Lyngdoh parakataha.