SHILLONG: A·dok BJP-ni Padot Ernest Mawrie-ni mija Sonibaro parakani gitade, Congress-ni sakgittam MLA-rang BJP-o napna gita ma·mong BJP-ni dilgiparangko grongaha.
Party-ona re·bana gita Congress-ni mitam MLA-rang Ma·mong BJP-ni dilgiparang baksa agangrikani koborrang angona sokbaaha ineba Mawrie aganaha.
BJP-o napangnasienggipa manderangni bimingrangko parakatna jechakgenchimoba, Congress-ni sakgittam MLA-rang BJP-ona napnasiengaha ine A·dokni BJP padot aganaha.
Gipin party-rangoniba uamangni party-ona re·banasigiparang dongama ine sing·anina aganchakengon, Congress party-onina agrede da·o dipet darangoniba BJP-ona re·banasigipa dongkujaenga, Mawrie aganaha.
A·dok BJP-ni koboro gita re·baenggipa 2023 Meghalaya Legislative Assembly election-na ga·timraonin kamrangko ka·soengaha.
“Chinga re·baenggipa 20 tariko state executive-ni tom·aniko ong·atenga, indake uano election-na maikae kam ka·sogen uarangni bidingo aro constituency-rango party tikitrangko am·giparangni bidingo chanchijolanggen,” Mawrie aganaha.
Ua agandapa je candidate-rangkode seokkuja indiba dam 10 mandal-rango tikit am·giparangde da·oba dongengaha.
2023 Assembly poll-o uamangni ka·dongsoani bidingo sing·anina aganchakengon, ‘‘Chinga bang·bata seat-rangko chegen ine anga aganjawa indiba sorkariko chinga rikdilgen ingipakode 100 percent agansona man·gen,” jenan chinga rakbee kamrangko ka·soenga, Mawrie agandapaha.
