TURA: Meghalaya a·dokna ma·mong sorkarini chame on·atgipa gong kror 59 tangkarangchi a·dokni SSA skulrango skigiparangna jagnini dormaharangko on·chengna a·dok sorkari manchiengon, ia jagnini dormaharangko Garo Hills-ni SSA skulrango skigiparangde ra·chakna man·jawa ine All Garo Hills SSA School Teachers’ Association (AGHSSASTA) parakatskaaha.
2021-2022 bilsina chamgipa tangka paisarangoni skanggipa bako gong kror 59 tangkarangko re·anggipa November 10 tariko ma·mongni Education Ministry, Meghalaya a·dokna chamataha aro ia tangkarangchi SSA skigiparangna jagnini dormahako on·chengna sorkari tik ka·aha ine adita salrangna skangsan, a·dokni Education Minister Lahkmen Rymbui parakatahachim.
Jagnini dormaharangko on·chengna gita a·dok sorkarini ku·rachakaniko on·angani ja·man Meghalaya SSA Schools Association (MSSASA)-ni gitaba ia jagnini dormaharangko ra·chakchengna tik ka·angahachim indiba bangki dormaharangko ta·raken on·skachina a·dok sorkario dabiengachim.
Indake ong·engon, SSA skulrango skigiparang jabonga jadok ong·pile an·tangtangni dormaharangko man·tokjae neng·nikanirangko chagrongna nangtokengahani gimin ia jagnini dormahako maming dakeba ra·chakna man·jawa aro ia November 30 tarikni gisepon SSA skigiparangna gro dongkuenggipa jabongani dormaharangko chu·gimik on·na nanggen ine AGHSSASTA dabiangskaaha.
“Minister-rang, dingtang dingtang department-ni officer-rang aro gipin skigiparangba an·tangtangni man·gnirangko somoi gita man·tokengani gimin maming neng·nikanirangko chagrongna nangjaenga indiba chinga SSA skigiparangde bilsiantian da·o gita jabonga jadok ong·pile dormaharangko man·jae cha·a ringa gri kamrangko ka·na nangenga. Chinga an·tangtangni kamrang baksana election, medical aro uandakgipa kamrangkoba ka·na draatako man·enga indiba chingni man·gnirangkode sorkari on·na gisik nangrongja. Chinga jabonga jadok ong·pile da·o dormaharangko man·jaengani a·selan chingni dedrangrangni skul fee-rangko gamna man·jae private skulrango poraienggiparangnade show cause notice-rangko man·tokengaha aro somoi gita skul fee-rangko gamna man·jaode chingni dedrangrang porikkarangko sepana man·jawaha,” ine AGHSSASTA-ni publicity secretary Bunbunbirth R Marak parakatenba, SSA skulrango skigiparangna chu·gimik jabongani dormaharangkon on·china sorkario dabiangaha.
SSA skigiparangna re·baenggipa November 30 tarikni gisepo chu·gimik jabongani dormaharangko on·jagenchimode skigiparang, December jani skanggipa antio New Delhi-ni Jantar Mantar-ona re·ange jinma jingjengatanggen ineba AGHSSASTA-ni publicity secretary parakataha.