Nongkhnum chichangko taridapna gita sorkari gong kror 13-ko chame on·gen

SHILLONG: Asia gimiko dal·batsranggipa chibima chichangrangoni gnigipa ong·e dal·batsranggipa West Khasi Hills a·jani Nongkhnum chichangko taridape ia biapo tourism-ko tang·doatna gita a·dok sorkari, gong kror 13 tangkarangko chame on·gen ine Sombar salo a·dokni Chief Minister Conrad Sangma parakataha.
West Khasi Hills a·jani headquarter Nongstoin-o Farmers’ Collectivisation for Upscaling of Production & Marketing Systems (FOCUS) program-ni ning·o bikotgipa Producers Group (PG)-rang baksa tom·e agangrikengmiting somoio iako a·dokni Chief Minister parakataha.
A·doko game ge·e cha·enggipa manderangni janggi tangani gadangko namdapatna gita sorkari gong kror 200-ko chame donaha ineba Chief Minister ia tom·anio parakataha.
Chief Minister-ni parakatani gitade, a·doko game ge·e cha·enggipa manderangni neng·nikanirangko aro nanganirangko ma·sina gita sorkari jotton ka·enga aro game ge·e cha·enggipa manderangna namgni ong·nagipa program-rangko sorkari ra·gate on·enga.
West Khasi Hills a·jani rama jal·langrangko namdapatna sorkari kam ka·enga ine janapatengon aro Greater Nongstoin Water Supply Scheme-ba da·o matchotangengahani gimin bakan ia scheme-ko kulie on·gnok ineba Chief Minister parakataha.
Ia FOCUS program-ko a·bachengatani bidingo talataniko on·angengon, game ge·e cha·giparangna pala sim·ani cholrangko on·e a·doko gama ge·ani kamrangko tang·doatna gita sorkari, ia program-ko a·bachengataha ine Chief Minister parakangaha.
Ia Farmers’ Collectivisation for Upscaling Production & Marketing Systems (FOCUS) program-ara game ge·e cha·giparangko ku·cholsan ong·ate ‘Producers Group’-rangko kulienba tangka paisani gita dakchake on·na Meghalaya Basin Management Authority (MBDA) baksa sorkarini nangrime ra·gatgipa program ong·achim ine nikna man·a.
Batanggimin somoirangoba ia apsan program-ni ning·on ua, a·dokni dingtang dingtang biaprangona re·ange game ge·e cha·giparang aro bading chiwalgiparang baksa agangrike, sorkarini on·enggipa dakchakanirangko man·na gita ku·cholsan nangrime ‘producers group’-rangko bikotchina didiengachim ine nikna man·a.
West Khasi Hills a·jao skanggipa producers group-ko 2021 bilsini March jao Mawshynrut Block-o a·bachengahachim aro uni ja·man July jaonin Nongstoin Block-oba producers group-rangko bikote da·o West Khasi Hills a·ja gimiko dol 183-mangni gita producers group-rang dongahachim.
Ia tom·anio West Khasi Hills a·jani aro mongsongbate Nongstoin Block-ni ning·o donggipa dol 36 producers group-rangna gong 21,95,000-ni cheque-rangko a·dokni Chief Minister Conrad Sangma aro jolni MLA Macmillan Byrsat-ni jakchi suale on·angjolaha.