SHILLONG: Shillong Press Club, Directorate of Information & Public Relations baksa nangrimenba “Sawa Mediana kenja” ine pangchakaniko donenba mingsa program-ko ong·aten mijalo National Press Day-ko Shillong Club-o maniangaha. Tom·anio, Minister of Information & Public Relations James P K Sangma, KHADC Chief Executive Member Titosstar W. Chyne, IPR Department-ni Secretary M. War Nongbri mangba dongpaaha.
Anga angni kam ka·aniko journalist-oni a·bachenga, unigimin anga National Press Day-ko manianio anga an·tangkon namen bak donge nika aro namen orto gnange nika ine Pa Sangma, mijalo National Press Day-ko maniao mongsonggipa sokgipa ong·e aganaha. Journalism, obostako agane on·gipa ong·a aro kakketko aganna nanga ineba ua aganaha.
Press-ni daitoara, uan kakketko mesoke on·ani ong·a aro Democracy-ni ia 4-gipa krong, ia daitoko rakkina nanga aro mikkang nitee kam ka·anirangoni chel·e dongna nanga, ua agandapaha.
A·dokni press fraternity-ni dingtang dingtang dabigipa, jedake Journalists Pension Plan aro Journalists Welfare Fund-ni bidingo sorkari chu·sokatna kam ka·gen ine Pa Sangma aganaha.
Press day-ko maniani somoio, mingsa Panel Discussion-ko ong·atgipao, Dr M Ampareen Lyngdoh, MLA, Paul Lyngdoh, MDC, Meghalaya-ni gitcham DGP W R Marbaniang, Meghalaya High Court-ni A·gipi Advocate V G K Kynta, Larsing M Sawyan, MD, Centre Point Group of Enterprises aro Joy Syiem, Policy Lead, North Eastern Network., uamangba dongpaaha.
