TURA: Tribal-rangni jakgitelanina krengdilgipa Bhagawan Birsa Munda-ni chang 146-gipa atchiani salko maniani bak gita Sombar salo Garo Hills-ni BJP dol, ‘Janjaatiya Gaurav Diwas’ ba Tribal Pride Day-ko South West Garo Hills a·jani Ampati-o donggipa Bollonggre songo manidilangaha.
Ia salko manianio BJP-ni state vice president Bakul Hajong, mongsonggipa sokgipa ong·e bakko ra·angaha aro ia tom·anio BJP-ni dingtang dingtang dilgiparang aro BJP-na kam ka·enggipa manderangba bakko ra·angaha.
Koborko on·ani gitade, ia ‘Janjaatiya Gaurav Diwas’-ko a·song gimikni dam 7500 songrango maniangaha aro Garo Hills-oba iako re·baenggipa November 22 tarikona kingking gipin a·jarango aro dingtang dingtang songrangoba manina sienga.
