SHILLONG: Meghalaya a·doko COVID-19 man·giparang komiangahaoba salantian COVID-19 man·giparang dongkuengani gimin aro COVID man·e sigiparangba dongkuengani gimin mikrake dongchina aro COVID-ni niamrangko ja·rikkuchina gita a·dokni Health Minister James K Sangma didiataha.
Meghalaya a·dokoba gittamgipa changna COVID giproroani cholrang dongkuenga ine janapatengon, iana sorkari pilak nanga kamrangko ka·soenga aro mikrake donganiko watgaljaenga ine Health Minister parakataha.
“Gittamgipa changna COVID giproroaniona chinga tarisamsoenga indiba COVID batrikrikjawaha ine chinga ka·dongenga,” ine Sangma aganaha.
Ia salrangoba COVID-19 man·giparang dongkuengani gimin sorkari, obostarangko name nirikkienga ineba Health Minister parakataha.
Adita salrangna skang ong·atanggipa Assembly by-election-o COVID-ni niamrangko pe·ani gimin janapatengon, COVID-19-ni giproroaniko warachakna dongimin niamrangko manderang ja·rikchina gita sorkari, manderangna mikrakataniko on·na jotton ka·enga ine Sangma parakataha.
“Jinma tom·bimonganirango manderangni niamrangko pe·aniara namen kragijani ong·aha indiba mikrake donganiko watgaljachina anga manderangko mol·molna ska. Mikkang salrang an·chingna mai ong·gen darangba agansona man·ja, uni gimin an·ching pilakan an·tangtangko naljoke rakkina gita pangnan mikrake dongna nanga,” ine ua aganaha.
Tika su·kugijagipa manderangko su·e ra·china gita sorkari didina jotton ka·enga ineba Health Minister parakataha.
Shillong aro Tura-o COVID hospital dakna gita tarienggipa nokrangni gimin janapatengon, kamrangko ka·sine matchotangengaha ine Sangma parakataha.