SHILLONG: Congress-ni adita MLA-rangko party-o rimnapna gita party-ni Ma·mong dilgiparangko grongdilna rimangenga ine A·dok BJP Dilgipa Ernest Mawrie-ni a·kange agangipa kattarangchi Grand Old Party, jajrengatako man·ja mangoba iarangni bidingo ritchengede ra·jaenga.
“Uni agangipa kattarangko anga nengraede ra·ja aro anga Shillongona sokjokon, iani bidingo chanchirimaniko dakna gita nipilani tom·aniko ong·atgen,” MPCC Padot, Vincent H Pala aganaha.
BJP-ni a·kange agangipa kattarangni gimin ua da·o dipetode mamingkoba aganna man·kuja indakoba ‘‘uamangni katta baditana kakket ong·a bon·kamaona senggen, maina sak 14 Congress MLA-rang BJP-o napnasienga ine uamang a·kangenga, indiba bon·kamaode saksaba dongjawa,” Pala aganaha.
MPCC Padot indakeba aganaha je ia apsankon BJP changni chang aganenga indiba be·en pil·akode nikjaenga.
“Chinga iani bidingo chanchirimgen aro chong·motko ru·utgijan ma·sigen,” ua agandapaha.
2023 Assembly poll-o seat-rangko bang·e man·gen ine BJP-ni a·kange agangipani bidingo aganskaengon, ‘‘uamango MLA sakgnisan dongaia, uamangba melian-meligrikja, aganade namen altua indiba kam manchaode dingtaiaha,’’ Pala aganaha.
Re·baenggipa 2023 Assembly poll-na skang BJP-ona ja·napbanasienggipa sakbonga MLA-rangko, jemangonin Congress-onin pakmaa, uamangko BJP National president aro national general secretary-ko grongdilgen ine A·dok BJP-ni Padot Ernest Mawrie Bristibaro aganahachim.
“November 20-ni ja·man, chingni State National Executive tom·anirang matchote, anga sakbonga mang MLA-rangko, chingni ma·mong BJP-ni dilgiparangko grongdilanggen” ineba Mawrie aganahachim.
BJP-ona katnapna am·enggipa MLA-rang da·o dipet sakbonga donga, jeon uamangoni sakgittamde re·bana tik ong·aha ineba A·dok BJP dilgipa aganahachim.
