TURA: Garo Hills Autonomous District Council (GHADC)-o GST-ko ra·gatna gita maming talatanirangko on·chenggija Trading for Non-Tribals (TNT) licence-na kajinarangko bariatna ine GHADC-ni Session-ona Bill-ko ra·baahani gimin Bristibar salo, Tura-ni BJP MDC Bernard N Marak, Session-oni ong·kate kataha.
Marak-ni parakatani gitade, GHADC-o GST-ko ra·gatna gitasa TNT-ni kajinako bariatna gita Bill-ko pass ka·na miksongengachim indiba GHADC-o GST-ko ra·gatani bidingo Executive Committee-ni dilgiparang maming talataniko on·chengkujaengani gimin ua Session-oni ong·kate kataha.
“GHADC-de GST-ni ning·o ga·akjani gimin ia Bill-ko pass ka·na jotton ka·aniara GHADC-ni autonomous council ong·aniko bilgriatna jotton ka·ani gitasa ong·enga. Adita jarangna skangan anga iani bidingo Taxation-ni Executive Membor Grahambell Sangma-o sing·doahachim aro Rikse Marak-ni Secretary ong·engmiting somoioba circuit house-o chanchirimahachim. Indake ong·genchimoba iani bidingo uamang name talataniko on·chenggija ia Bill-ko pass ka·nasa jotton ka·enga,” ine Tura-ni MDC parakataha.
Chonchongipa bading chiwalanirangko dake cha·enggipa manderangoniko kajina bate ra·na miksonge aro mitam politician-rang baksa jak donggipa dal·dalgipa company-rangonikode komibate kajinako ra·engani giminba ua ia session-oni ong·kate kataha ineba Marak parakataha.
“Ia Bill-ko ra·chakna skangan bading chiwalgiparangoniko ia gital tarigimin kajinarangko ra·engaha aro da·osa ia Bill-ko GHADC-ona ra·baskaenga. Ia bill-ara mitam bading chiwalgiparangoniko changgittam bate kajina ra·na aro dal·dalgipa company-rangoniko komibate ra·na miksonge ra·gatenggipa bill-sa ong·enga,” ine Tura-ni MDC talatangenba, GHADC-o GST-ko ra·gatani gimin Executive Committee-o chanchirimahachim indiba ia Bill-ko NPP-chi dilenggipa Executive Committee pass ka·drana jotton ka·engani gimin iano ua bak ong·pana sikja ine parakataha.