W’nagar-o gital SBI branch-ko kulia

TURA: East Garo Hills a·jani headquarter Williamnagar Bazar-o State Bank of India (SBI)-ni gital branch-ko kuliaha ine kobor on·aha.
Koborko on·ani gitade, ia SBI Williamnagar Bazar branch-oba gipin branch-rango gitan gital kolrangchi kamrangko ka·gen aro ia branch office-on ATM booth-ba donggen.
Ia gital branch-ko kuliahani gimin East Garo Hills a·jani Deputy Commissioner Swapnil Tembe, SBI-ni official-rangko mittelpilangengon, da·o adita jarangni gisepon Williamnagar-ni Ku·simkolgre aro Supermarket jolrangoba SBI-ni ATM-rangko kulina miksongenga ine parakataha.
Indake ong·engon, bakan Samanda-oba SBI-ni branch-ko kulignok aro Songsak-oba SBI-ni branch-ko kulina gita jotton ka·enga ine East Garo Hills a·jani Deputy Commissioner parakataha.
Williamnagar-o SBI-ni ia gital branch-ko kuliahani gimin ian jolo songdongenggipa manderangna bang·a namgni ong·gnok ine niksamsona man·enga.