TURA: National Tournament-rango bakko ra·enggipa Meghalaya Cricket dolo a·doktangni chadamberangna bate gipin a·dokrangonisa bang·bate kal·na cholko man·engani gimin ia dolo gipin biaprangoniko ra·gija a·doktangni Khasi aro Garo chadamberangkon ra·china gita Association for Democracy & Empowerment (ADE) dabiangaha.
ADE-ni president Dalseng Bira Ch Momin-ni parakatani gitade, da·ororo ong·atenggipa Under 25 Cricket Tournament-oba Meghalaya a·dokni bimingo kalenggipa dolo Khasirangoni saksa aro Garorangoni sakgnisan dongaia aro bang·batan gipin jatrangsa ong·tokachim.
Indake ong·engon, Khasi Students Union (KSU)-ni dabiani gita Meghalaya a·dokni pal bakko ra·enggipa pilak dolrangon Khasi aro Garorangnasa chu·gimik biapko on·chengna nanga ine ADE dolba dabiangaha.
“KSU-ni janapgimin gitan a·dokni sports association-rang pangnan a·doktangni Tribal-rangnasa biapko on·chengna nangachim indiba Under 25 National Tournament-o bakko ra·enggipa Meghalaya dolo Khasi saksa aro Garo sakgnisan dongaia. A·doktangni chadamberangnan biapko on·chengjagenchimode ian mikkangchi Tribal chadamberangna ka·donga gri ong·ata gita ong·gen,” ine Momin janapatenba, Meghalaya a·dokni Cricket dolo Khasi aro Garorangna biapko on·chengchina gita KSU-ni dabianio ADE-ba chakpaaniko on·enga ine parakataha.
