SHILLONG: Bilsianti Shillong songjinmao ong·atenggipa Cherry Blossom Festival-ko Bristibar salo, Meghalaya a·dokni Chief Minister Conrad Sangma aro India a·songona Japan a·songni Ambassador Satoshi Suzuki, do·ga oe on·angaha aro ia festival-ko a·bachengate
on·angani somoio Meghalaya a·dokni Chief Secretary Rebecca Suchiang, NEC-ni Secretary K Moses Chalai, Tourism-ni Commissioner & Secretary Dr Vijay Kumar, a·dokni PCCF B K Lyngwa aro gipin official-rangba dongpae bak ra·angaha.
Ia Cherry Blossom Festival-ko a·bachengatanio a·dokni Chief Minister jinmana aganprakangengon, Meghalaya a·doko doka dam·ani, jakni kamrang aro jatni daka rikanirangko ra·dona miksonganio sorkari, ia festival-ko bilsiantian nambate aro dal·bate ong·atna jotton ka·enga ine parakangaha.
Salgro salaram a·dokrango donggipa chadamberangko dingtang dingtang changa sapanirang dongani gimin mittelpile aganangengon, iandakgipa festival ba manianirangko ong·atanio chadamberang saksa sakgipinni changa sapanirangko skie ra·grikna aro an·tangtangni changa sapanirangko mesokna gitaba cholrangko man·enga ine Chief Minister parakataha.
Re·baenggipa 2022 bilsio Meghalaya a·dok bilsi 50 gapengahani gimin ia bilsi 50 gapaniko maniani bak gita sorkari, dingtang dingtang program-rangko ong·atenga ine janapatengon, iandakgipa program-rangko ong·atanioba chadamberang, an·tangtangni changa sapanirangko mesokna cholrangko man·angkugen ine Sangma aganaha.
Meghalaya a·doko music ba doka dam·anio gisik nanggipa chadamberang bang·en dongani gimin sorkari, doka dam·anio gisik nanggipa chadamberangna cholrangko on·na gita ja·ku de·enga ineba Chief Minister parakataha.
Ia chang Cherry Blossom Festival baksana Shillong Literary Festival-koba ong·atjolengani gimin ian sea jotanio gisik nanggipa manderangna an·tangtangni sea jotanirangko nambatatna aro mingsing minggamgipa manderangoniko skie ra·na namgipa chol ong·enga ineba Sangma aganaha.
Ia Cherry Blossom Festival-ko ong·atanio pilak nanga dakchakanirangko on·engani gimin ua dingtangmancha Japan sorkarikoba mittelpilangaha.
Ia Cherry Blossom Festival-ko a·bachengate on·angani somoio India a·songona Japan a·songni Ambassador Satoshi Suzuki-ba jinmana aganprakangengon, ia festival ba manianiara India aro Japan a·song damgnio songdongenggipa manderangni gisepo meli nangrimaniko ra·bana namgipa cholba ong·a ine parakangaha.
Mikkangchi a·song damgnini gisepo bading chiwalgrikani aro dingtang dingtang kamrango mangrakbatatna gitaba ua Meghalaya sorkariko ku·mongangaha.