SHILLONG: Meghalaya a·doko gitcham chief minister Mukul Sangma-ko man·chape Congress dolni sak 12 MLA-rang, Budbar walo All India Trinamool Congress (AITMC)-o napangskaaha.
Mukul Sangma baksana Congress doloni ong·kate TMC-o napanggipa gipin MLA-rangara, Charles Pyngrope, HM Shangpliang, George B Lyngdoh, Dikkanchi D Shira, Miani D Shira, Zenith Sangma, Winnerson Sangma, Marthon Sangma, Jimmy D Sangma, Shitlang Pale aro Lazarus M Sangma ong·a.
Congress doloni ong·kate TMC-o napskaani gimin talataniko on·angengon, Meghalaya a·doko aro India a·song gimikon Congress dol, mongsonggipa opposition dol ong·genchimoba a·songni namgnina maming kamrangko chu·sokatjaengani giminsa uamang Congress doloni ong·katna tik ka·aha ine Bristibar salo a·dokni gitcham chief minister Mukul Sangma parakataha.
A·doktangko aro a·songko chel·chakanio an·tangtangni daitorangko ma·siesa uamang Congress doloni ong·kate TMC-o napangskaaha ine talatangengon, Meghalaya a·doko songdongenggipa manderangba dingtanganiko nangnike gital political dolko sandiengani giminsa uamang ia ja·kuko de·aha ine Sangma parakataha.
“Chinga name chanchichengani ja·man Trinamool Congress baksa bakrimskana tik ka·aha. Manderangna nambate dangdike on·na miksongani gnangsa chinga ia ja·kuko de·aha. 2018 bilsini Assembly election-o chinga sorkariko rikna ka·dongachim indiba sorkariko rikna man·jaha. Election-ni ja·manoba chingni membor-rangko rime katna jotton ka·anirangko chinga nikaha,” ine Sangma aganaha.
Congress-ni MLA-rangko TMC-ona rimbaanio I-PAC-ni dilgipa Prashant Kishor-an mongsonggipa ong·aha ine Mukul Sangma aro Charles Pyngrope sakgnian parakataha.
Sangma-ni aganani gitade, Prashant Kishore aro ua sakgnian apsan miksonganirang dongani giminsa uamang Congress doloni ong·kate TMC-o napskana gitaba tik ka·aha.
Indake ong·engon, dilgiparang ong·e uamang an·tangtangni ma·siani gita aro changa sapani gita kamrangko ka·na gitasa miksongenga uamang ia ja·kuko de·aha ine sakgipin MLA Charles Pyngrope parakatskaaha.
