SHILLONG: Congress doloni ong·kate All India Trinamool Congress (AITMC)-o napskaahani gimin a·dokni bang·bata manderangan uamangko mitteltokenga ine Sukrobar salo a·dokni gitcham chief minister aro Congress doloni ong·katdilgipa Mukul Sangma janapatenba, manderangni bakrimanichi uamang 2023 bilsini Assembly election-ni ja·man a·doko sorkariko rikgen ine an·tangni ka·dongchakenganiko parakataha.
Sangma-ni parakatani gitade, uamangni Congress doloni ong·kate AITMC-o napangani ja·man uni bang·bata ripengrangan una phone ka·ate uamangni kamna mitteltokatahachim.
“Angni ripengrang angna phone ka·ate uamang ching baksa ong·enga ine aganataha aro uamang chingna pilak nanga dakchakanirangkoba on·na ku·rachakataha. Chinga manderangni bakrimanichi 2023 bilsio sorkariko rikna man·gen,” ine Sangma parakataha.
Sangma-ni iandake aganani gitade, uamang a·dokni gipin dolrang baksa agangrikani cholrang dongnaba gnang ine niksamsona man·enga.
Meghalaya a·doko Trinamool Congress dolko sawarang dilgen, ja·mano uamang jinmana u·iatgen ineba Sangma parakataha.
Congress doloni ong·kate TMC-o napanggipa MLA-rang bilgriaha ong·ja indiba a·dokna aro a·songo songdongenggipa manderangna chanchiesa ia ja·kuko de·aha ineba Sangma parakattaiaha.
Meghalaya a·dokni gitcham chief minister Mukul Sangma-ko man·chape Congress dolni sak 12 MLA-rang, re·anggipa Budbar walon AITMC-o napangskaahachim ine nikna man·a. Congress MLA-rangni ong·katangani ja·man, uamang bilrang dongjahani giminsa Congress doloni ong·kataha ine Meghalaya Pradesh Congress Committee (MPCC)-ni president Vincent Pala parakatskaahachim.
