SHILLONG: Sukrobaro, Mawdiangdiang-ni Parade Ground, Shillongo Guardsman of the Central Training Institute of Civil Defence & Home Guards-ni 4-gipa Basic Course-ni Passing Out Parade-ko ong·atangaha.
Me·asa sak 75 aro sak 13 me·chikrangko man·chape gimikchi sak 88 Guardsman-rang uamangni training-ko matchotangaha.
Passing Out Parade-o jinmana aganprakengon, “Cholon-bewal aro kamo sapanian mingsa Uniform Service-ni bak-rengsi ong·a’’ ine Meghalaya Home Guards aro Director of Civil Defence-ni Commandant General, AR Mawthoh aganaha.
Mawthoh indakeba aganaha je, uniform service-ode an·ching gisik seng·gipa ong·na nanga indiba orto gnang kim·kime niamko ja·rike aro apsan somoion an·chingni dakgniko watgija manderangming gisik seng·e kam ka·na nanga.
Na·simangni kam ka·anio chagrongnasienggiparangko mikkangchakna amna gita na·simangko gisikni gita aro be·en bimangni gita tarisona ia Basic Training-ko ong·atani miksongani ong·a aro ian na·simangni kam ka·a gimiko ian gisik ra·batgnigipa somoiba ong·gen ineba Mawthoh, sak 88 sipairangna nama skani salamko on·jole aganaha.
Physical Training, Weapons Training, Foot aro Arms Drill, iarangna agreba Guardsman-rangna Civil Defence aro Disaster Management Subject-rangkoba skie on·aha ine Central Training Institute of Civil Defence & Home Guards-ni Commandant WH Khongsngi aganaha.
“All Round Best Recruit Guardsman” award-ko chegipa Banshemlad Kharbani parade ka·aniko dakdilaha, jeon Civil Defence Subject-o Best Recruit Guardsman-na running trophy chegipa Herolin Kharmyndai Parade-ni Second in Command ong·e dilangaha.
Trainingo nambate dakgipa sipairangna Meghalaya Home Guards aro Director of Civil Defence-ni Commandant General, AR Mawthoh, mandera·e boksisrangko on·angaha.
